الثلاثاء، 13 مارس 2012


هي دي الحكاية...... وبس

((يفضل تشغل أي مقطع موسيقي بتحبه قبل ما تقرا))

في يوم جميل من أيام مصر...يوم مشمس حتى في الشتا !
والسماء زرقا بلون ياخد كل عين متعودة على الجمال
طبيعة ربنا هدية لينا ولأي حد على أرض البلد دي

                                              **********
ومن غير مقدمات كتير
بعدسة كاميرا مصرية
زاوية وكادر وناس حقيقية
نحكي حدوته مصرية

                                           ***********
فيلم حكاية
تذكرته وافتح السلة
محوش إيه ياترى
بسمة –أمل – ورد حياة
ادفع ومتستغلاش

                                          ***********

أكشن (1)
تعالا كده بالكاميرا معايا نبص سوا
خد الكادر من اليمين عند كنتاكي التحرير
ولف بالكاميرا وإدي ضهرك لكنتاكي وبص للميدان
شايف الزحمه
سامع الدوشه
كلاكسات عربيات مسروعه
صوت واحد بيضحك
بيزعق
بيشتم
بيكلم نفسه
عادي
ماهو ده ميدان الحياه
إرجع تاني ولف بالكاميرا شايف الرصيف بتاع كنتاكي وقبله بشوية محل الجرايد ومحل سفريات شايف الحته دي
مشهورة ...الحبيبة بيستنوا بعض عندها
مش بس كده دي كانت اشتهرت أوي أيام النت أما كان لسه حاجه جديده والناس في الشات يتفقوا يشوفوا بعض هناك
حاجة لذيذة أوي
أيوة ركز بالكاميرا على البنت الي جاية  دي
أجنبية؟
لا دي عربية ومصرية
بس من الجامعة الامريكية
لابسه اسبور أصل الدنيا شمس!
واتنين شباب سيس البناطيل ساقطة
البوكسر باين
الوكمن في ودانهم بيسمعوا أغنية روك
وماشين يترقصوا
كانهم في ديسكو!
بسسس...هنا اعمل زوم بالكاميرا على الي جاية دي
ست ؟
لا بنت لابسة عباية ملزقة وضاربة شعرها اصفر!!
دي أكيد رايحة الكونيش عشان نمرة في مركب
- نمشي وراها بالكاميرا؟
لا خلينا هنا تعالى خد الكادر ده إدي ضهرك للميدان واعمل زوم على الكافيه نت المزنوق بين المحلات الي حواليه
تعالا ندخل المحل ولا أقولك خلينا عالباب واشتغل زووم مش هتعرف تتحرك جوة
شاشات كمبيوتر محمومه
وكراسي عليها بني أدمين والكل راسه مضروبة الوان من الشاشة
وكلو صوتوا عالي على كلو
إعمل زوم هناك عند الي قاعد في الركن ده
يا ابن الايه أتاري واخد ركن بيكلم واحده شات فاتحالوا كاميرا... عريانة؟
لا مش عريانة أوي لابسة كت بس!

متنساش وانت بتعمل مونتاج تكتب تواريخ الي بنصوره ده للتوثيق يعني

الحق ....هات الصورة دي ركز عليه وهو بيعاكسها ...الله مش كانت بتعافر في الأول دي مشيت معاه!!
ماعلينا

                                       """ايه يا دنيا ياغريبة"""
ستوووووووووووب


أكشن(2)
يوم تاني ..مكان تاني
في مركب في النيل من باب الفسحه والكاميرا معانا
في شلة قاعدين بيهيسوا بيضحكوا بس في واحد منهم مكفي على لاب توب معاه
 قرب كده منهم عايزين نسمع
الي ماسك الاب توب بيقول لصحابو:
* شفتو يا جماعة الواد الي الدنيا قايمة عليه دي
يرد واحد وهو بيتهز على الأغنية الي شغالة:
* واد مين؟
*بتاع الاب توب : واد في اسكندرية اسمه خالد سعيد الشرطة قتلتوا وبهدلوه بصوا كده عالصورة
لف الاب توب في اتجاههم عشان يبصوا عالصورة ، كلهم في نفس واحد وشبه غمضوا عينيهم *ياعم بقى فكك من أم النكد ده احنا جايين نهيس ولا نتخنق؟
بص لهم  بصه عامة كده:
*ممممممم معاكو حق والله
وراح قافل الاب توب من غير شت داون حتى
وانضم ليهم وهات يارقص وضحك.

في أخر الرحلة بيسلمو على بعض وبيقولوا نتقابل نت بقى
   -متنساش تنزل أغاني تامر الجديدة في المنتدى
-        أنا أبويا هيولع فيا وبيلعن الفيس الي لحس مخنا على قولوا
-        أه فكرتيني الصورة الي حاطاها في البروفايل فاكسانه أخر حاجه حطي واحده من بتوع النهارده بقى
-        اوك أنا هنزل كل الصور واعملكوا تاج
-        ياجماعة اعملو لايك لصفحة اسمها كلنا خالد سعيد وشيروها جامده
-        بس بقى ياولا ا
-        نت هبلتنا بأم النكد والسياسة بتاعتك دي
-        خلاص خلاص يا جماعة متزعلوهوش مش هتخسروا حاجة لما تعملو لايك يعني؟

اوك جماعية.... وخلص اليوم واتغير المشهد
ستوووووووووووووووب


أكشن(3)

لقطات من شارع شبرا
** اتنين سواقين ميكروباص بيتخانقوا علشان واحد قفل عالتاني ، وفي الهوجه عيل سرق رغيفين عيش من فرشة عالرصيف الراجل شتموا ومقمش من مكانو!

** واحد مأ نجج واحده وبيبصوا على فاترينة لانجيري

** محل فول وطعمية عليه زحمة أوي  وجنبه محل عصير قصب ،ريحت المحل قبر!!

**في قهوة فيها تلفيزيون ساب صاحبها بالغلط  برنامج توك شو وكانو بيتكلمو عن قضية خالد سعيد واحد راسه صلعة وعندو كرش يفكرك بموظفين السجل المدني :
- ده ابن كلب مترباش أصلاً يستاهل الي جرالوا
يرد عليه صبي القهوة لما سمعوا
- ياحج!! ياحج دول بيقولوا متلفق ليه التهمه دي وانو شريف زينا
- بس ياض اشفهمك انت هو لو شريف كان اتفضح كده!! ما احنا أهو حد كشفنا؟
- أيوة ياحج بس .....
يقاطعه أبو كرش
- اسكت ياولا وروح شوف شغلك
يختفي الصبي خلف الكونتر وقد اتنرفز من أبو كرش.
ولو كانت الكاميرا بتاعتنا بتدخل العقول كنا شفنا ان الصبي ده عضو في صفحة كلنا خالد سعيد! وبعد المناقشه دي قرر انو ينزل المظاهرة الي كانو قايلين عليها في الصفحة وهو الحقيقة مكنش لسه واخد قرار!
ستووووووووووووووب


أكشن (4)
قبل 25 يناير بيومين
واحدة ست شكلها يدي على طيب من بولاق تقريبا قاعده جنب صاحبتها في الميني باص وبيتكلموا
-        بنتي امبارح بتقولي انها شافت في النت ...
تقاطعها صاحبتها
-  انتوا دخلتو نت البيت؟
-        اه ماهي فضلت تزن لغاية أما جبتلها وصلة من ابراهيم بتاع السايبر الي تحت ،
 بتقولي إن في بنت راحت القسم تعمل محضر في واحد اتحرش بيها قام الضابط اغتصبها ولبسها قضية ؟
-        مابتوع الداخلية دول كفرة خدو واد من الحته عندنا رجعوه مشلول
-        لا مشلول دي يبقى راح أمن الدولة
-        أهو كلو محصل بعضوا بقى ، الواحد والله معدش مستحمل البلد دي
-        أه وبتقولي في بنت مصورة نفسها وعمالة تقول انها هتنزل تعمل مظاهرة وبتقول كمان...
 وراحت مقربه على اذن الست وبصوت واطي :
-  دي بتقولي انها بتقول كلام مش ولابد عالريس
-        ياشيخه وهما سايبينها
-        والله ياختي مش عارفة بنات اليومين دول خلاص مبقاش يهمهم حاجه....بس بيني وبينك بت جدعة
            وزفره حارة لسعت قفاي من الاثنتين.

ستوووووووب


 بس ياسيدي وروحت الكاميرا تنام وصحيت  لاقيت نفسها عاملة ثورة

                                                                    شيماء النمر